今個sem break，出左好多日街，又駛左好多＄＄＄＄～
然後，放假前，因緣際遇之下，我join左個原本以為冇咩要做既cat society，點知，以為唔駛做野既都係要做，然後，我又好似之前咁～一遇麻煩就好想走佬，但係，唔可以再係咁架啦～所以，要堅持堅持！！！！
今年打算讀一個課程，如果佢開得成既話，再睇下，自己究竟係咪有興趣向嗰方面發展。
然後，前幾日諗緊自己比較適合既方向。比左三個選項比自己。
再然後，做左一件，點都諗唔到我會做既野。不過,係開心既~
今年既目標係儲錢，因為Summer要去周圍走!!!!好驚自己會大駛到冇晒$,所以呢~~~慘啦我~~要學識節衣縮食。
sem 1 過得好快~
今年識左好多人,相遇過又道別,感覺無奈。
不過,好開心,今年識左好多好值得向佢地學習既朋友,亦好幸運得到佢地既照顧~~~~真係我既福氣~
加油呀今年~
尋日原來偷得浮生半晚閒~~打左半篇blog,點知,突如其來既事故,令到我咩都整唔到,仲要急急忙忙咁去醫院過左兩個鐘倒。
尋日,我媽唔舒服,嗌暈想嘔,佢嗌左三聲,我就放低d野出去,叫佢頭暈就唔好走嚟走去,佢又唔理我,自己行去廁所,我就旁邊傍住佢,點知行唔夠一半,佢就暈低左,佢咁重,我扶唔住佢,一下佢個頭就撞左去牆邊,仲要叫佢佢唔應,成半分鐘,我姐又要反應遲鈍咁見我好急咁問阿媽有冇事又扶又拉咁,佢都成十秒左右先過嚟扶,不過都係唔夠力,屋企d男人仲冇用,唔單止反應遲鈍,仲要肥師大隻都冇力扶起一個女人!
好彩我媽半分鐘倒醒返,係咀唇撞爆左,不過,見佢咁唔舒服,又暈過,咪叫佢去醫院,但係佢唔鍾意醫院,所以點都話唔去,咁我咪打比個阿姨睇下可以點做,但係最後我都係打左電話call白車。
咁大個人都係第一次報警,第一次坐救護車,第一次見到阿媽喺我面對"碰"一聲咁撞落地度,好彩,我膽大襟嚇!
阿媽原本叫我唔好跟佢去,但成屋人,得我一個今日唔需要太早起身,所以,最後我都係冇理佢,跟車同佢去醫院。
其實,佢撞倒之後反而比較精神,上到救護車,其實我都有d覺得,可以唔call車,自己去醫院都得,因為邊有人啱啱暈低過撞到頭,都仲可以咁樣同救護員一人一句咁講野既呢?!
去到醫院,我發現,我係遺傳自我媽既~~~一個唔合作既病人。
我媽怕痛,醫生叫佢唇入面要縫針,佢唔制,話同佢打破傷風針,佢話唔駛,叫佢留院觀察,佢話照完x光冇事就要返屋企。我發現,醫生同d姑娘都當我媽係小朋友咁同佢講野。
去到1:00am左右,我媽叫我返屋企,因為我呢排就考試,又病病地,佢叫我唔好同佢捱夜,所以最後我都係走先。
不過,其實成晚都訓得唔好,因為以為醫院會喺我媽離開醫院既時候打電話通知我一聲,點知都冇既!然後,6:00am左右就起左身,睇到我媽訓左喺床度,先再入房訓過。
不過,難得暫時忙完一大輪之後既偷閒咁就冇左lu~~~
所以,而家要補返。
一陣咁多啦~~~
***
上兩個星期,真係忙到每日平均睡眠時間不足5個鐘,唔係趕assignment,就係趕presentation,一係就project,一係final report,再唔係就individual essay,仲要一科mid-term,一科final exam,仲要衰左比感冒菌,日日都同紙巾相對,差唔多日日都11:00pm先喺學校離開,返到屋企,一兩點訓,四五點起身。
第一次做presentation,係present前半個鐘都仲趕緊PPT,嗰日仲要唔知醒,因為前日太攰,訓到不醒人事,仲要成份小冊子未做完,SCRIPT都冇準備,連自己嗰PART既PPT都冇睇過,因為係人地整既唔係用我寫既REPORT,所以我都唔知佢寫左D咩。
第一次冇script咁present,我覺得自己好叻~~~!!!!
然後,到上星期五,頂唔順終於去睇醫生,食左藥之後,昏睡左兩日,星期一仲要考final,未溫晒書就去考,死梗啦今次,佢最好比個F我,咁我就可以RETAKE!!!!!
到星期二仲做趕醫要趕既野,點知,又冇端端多左野做。
原本做完om case study就可以走人,點知差d嚇死我。做左幾個鐘,做完我負責嗰part諗住send比負責combine既組員,點知打打下email,打完既時候,部電腦突然黑晒,叫我重新開機,因為我學生既電腦系統係重新開機就乜都冇晒。起初,我只係歎息又要打過email,我既file應該save左落USB度,點知,去個FD既電腦度,個FILE只SAVE左一半,仲要係比較容易嗰半!!!!!當堂呆晒!
又點知,當我唔死心,點解我一邊做一邊SAVE都冇晒D資料?!於是重新開機,因為我之前SEND過份FILE比身邊個FD,佢叫我用O DRIVE,然後,真係比我見到個FILE仲喺度,仲要係完整版!!!!!!!!好似由地獄去返天堂咁!!!兩滴眼淚真係白流!!
然後,因為接到IMC組員電話,答應佢睇完個Final report有冇問題先走,點知.....
因為IMC個final report combination係另一個同學負責,其實原本係我做既.......應該話...........組員唔知點解expect係我做........但係我真係太多野忙緊,分身不暇,就托另一個我覺得可信既組員去做,點知,可能...佢都好忙掛....於是....佢真係將d野擺埋一齊就算.....冇執又冇改....仲要唔理requirement....超晒頁數.....佢負責嗰part,之前我地成組傾過話要改晒佢既,佢竟然咩都冇改過......於是,我又要執過晒佢,原本仲同阿媽講8:00pm左右應該返到屋企,點知都係12:00am多d先返到去食飯.......
呢兩個星期,都胃痛左三次,真係....原來我都唔係好捱得。
好彩揾左個fd幫我頂補習,又cancel左幾日補習,不過,頂左三日就已經冇左$800幾蚊......真係有d肉痛!!!
check埋個OM case study就可以收工,全職溫書~~~希望,真係好希望,冇野要改,唔駛再開會!!!!
祝我好運啦~~!!
正衰人嚟架,人地唔忙就唔搞咁多野,一忙佢就衰呢樣衰嗰樣!!!!!!!!!用咩電腦喎!!!!成日都係咁既!!!!!!人地唔係趕做present既時候就唔衰!一趕就衰到貼地!!!!!尋日已經衰左一次架啦!!!今日又嚟,仲要衰多幾錢重!!!!!成個USB都開唔到!!!!
好彩!!!我SAVE多左幾份,唔係好似尋日嗰份咁,就慘囉!!!!重新再做過,你估我好得閒咩!!
好彩頭先重整之後,D FILE開得返咋!!唔係既話我一定喊比佢睇!!!!!
體諒我係電腦白痴,唔好玩我得唔得!!?
得閒死唔得閒病!!!唔好再病落去啦~~~SEM BREAK先再嚟好唔好?!!
而家只有一個字形容: 忙忙忙忙忙忙忙~~~~~~~~~~~~~~~~~~~~~~~~
http://www.my3q.com/home2/74/kung_kly/48713.phtml
麻煩各位朋友~~~~5-45歲既朋友~~~幫我填份問卷~~~~學校presentation用架~~~~!!!!到下個星期六(21/11)前都需要人幫我填~~~~!!!!麻煩你地~~~謝謝~~~~
呢排運氣好似唔係咁好,成日都遇到D麻煩野既?!
上次去長洲既時候,接到一個電話,無聊人打嚟既,CUT左佢線。尋日同FD出去既時候,又係佢打嚟,因為我認得佢把聲,我第一時間問佢係邊個,點解會有我電話,佢已經唔係第一次打嚟,但係佢都仲係要好無聊咁講野!於是,我又CUT佢線,但係,佢好快又即刻打過嚟!我都只可以唔接!
因為佢係用「私人」,睇唔到佢NO.又唔可以將「私人」電話都列黑名單,因為我D FDS都會用「私人」打比我。我好肯定我唔識佢,因為佢把聲我之前都冇聽過,無聊人!!!我D FDS又應該唔會冇問過我就將我既電話比人架?!!!唔通佢係亂打咁打過嚟既?!
***
去完長洲之後,都係比人煩,上面嗰個無聊人之前,再加一個唔熟既人,唔通係佢本性熱情?!不過,真係唔好意思,本小姐為人好冷漠架,所以,唔好成日揾我啦唔該!!!!
***
牙醫仲未睇!!!好煩呀,唔可以即刻整好佢,一日唔整好,一日個心都有種「囉囉亂」咁唔舒服既感覺!!!
我慣左想做就做架嘛!!!!!
煩!!!!
***
好多野要做,唔通我既時間管理真係咁有問題?!!!!
***
唔知用網上整問卷調查,又煩!!!
今日IMC present完，然後，下次既大presentation一定唔可以好似今日咁啦~~~~!
聽日9:30返學校開會,真係星期六都要早醒好慘!
11 & 12月份要做既野:
10/11 MS group meeting
11/11 MM group meeting
14/11 MS group assignment (5)
20/11 MM presentation
21/11 MS assignment (6)
24/11 MM mid-term
26/11 IMC presentation
27/11 LCCI
28/11 IBM individual assignment
28/11 MS assignment 7
1/12 IBM final exam
7/12 OM case study
3/12 IMC final report
12/12 MS finaln exam
13/12 MM final exam
16/12 OM final exam
18/12 IMC final exam
仲唔知有幾多個會要開，同埋ＯＭ仲有幾多份assignment要交。
LCCI未溫......學校都唔知喺邊......
MS都要用電腦做，一做就做好耐，電腦白痴真係麻煩。
科科都要睇textbook......
真係.........
SEM break快d嚟啦~~~~
***
尋日,發生左一件怪事。
＊＊＊
今日發現自己有蛀牙，我明明日日刷牙，好勤力咁刷架啦～～～糖又食少左！！點解會咁架！？仲要揾時間去睇牙醫補牙！好麻煩呀！
今日，有D灰，或者，唔單止係有Ｄ。
發現，身邊有好多好多比我叻又比我勤力的人。
咁多年，一早都應該明白自己唔係聰明過人，但又唔肯將勤補拙。
懶筋真難剔除。
所以，今日，其實唔應該覺得太灰，反而應該同自己講：你真係付出唔夠。
加油啦！
上星期，同媽有Ｄ不快，我同佢講唔落去，然後，起身走人，之後，返屋企喊左一場。
之後，決定，以後唔再理佢地之間既問題。
發現，自己既負苛量好微，再承受唔起佢地加諸上嚟既垃圾。
佢同我講，做左Ｄ乜，搞左Ｄ乜，到最後，跟本好似冇聽過我講既野咁，搞到一團糟，每一次都係咁，我真係頂佢唔順！佢有冇諗過，我都有自己既野要煩，如果我唔開心，我要發洩既話，可以向邊個倒垃圾？！
嗰日我第一次咁樣對佢，之後，佢都應該知道知道，我唔會再理佢地既事。如果，我幫佢，都令佢覺得我係偏幫對方既話，咁，我冇野好講，亦唔會再講。
依家，我揾唔到人，可以喺我最唔開心既時候，比我倒下垃圾。
轉變，真係好無奈，不過，會慢慢接受。
我唔想，每一次都係麻煩你，唔想每一次，都只係同你講呢Ｄ野，雖然，每一次我都先會諗到你，但係，我而家學識，人都係靠自己比較好。
始終，你有你既忙，我既事，其實，同你冇關，更何況，距離遠左既時候，我都唔好再煩你。
我唔鍾意，變到好似酒肉朋友咁，每次見面都好似例行既事，最少，我係咁既感覺。
凡事睇輕Ｄ，就會容易接受。
當我說，想你，所以打電話給你，你卻抱持懷疑地問，真的嗎？
一而再地說，你卻還是問我，是不是有什麼不開心？
這樣，令我有些反省，是不是，我每次找你，都是因為有心事？難道我每次都只會向你發洩我的負面情緒？
如果，打電話給你會給你這樣的感覺，那麼，我寧願不再找你，因為，我不願變成這樣只會增加別人負擔的人。
我說，想你的時候，真的只是單單的想念你。
我的朋友。
他朝君體也相同。
我相信，父母子女之間的關係會一代代承傳下去。
今日你是如何對待你的父母，日後，你的子女也會如此對你，到那時候，請別怨，因為，這是你應得的。我，祝你早日面對。
我十分的不明白，為何會有這樣的人？
也許，有他們的存在，才能映照出世上還有好的人在。
一句：怎麼能有這樣賤的人？！
明知道自己有好多野住完成，明明要自己跟住進度跟住個plan去做，但最後都係放左自己一日假～～～～臨時約左candy出去行街~~~
發現自己一覺得唔耐煩就會想買野發洩，好多時，明明諗住買一樣野，點知，通常都係買左好多其他不在預計之內會買既野（除非冇帶＄喺身度！）～～～market會好高興多多幾個好似我咁既消費者!!!
＊＊＊
上完第三個星期堂，我既professors都幾好人~~~
我最鍾意既都係IBM既professor~~~~Paul~~~佢係外籍教師，一個同Jerry一樣都好紳士感覺既Professor~~~~尋日上堂前，我入到課室～～～同佢傾左一陣～～我問佢係咪剪左頭髮～～佢話係～～～仲問我覺得點，跟住我好唔識做咁同佢講～～～that's ok.~~~佢就話，只係ok?表情同語氣都好好笑~~~
＊＊＊
讀左３個星期，越嚟越覺得，IBM、OM同IMC三科可以撈埋一齊讀，因為好多野，IBM堂講完，OM又講，然後IMC又會聽多次~~~所以，都幾驚考試既時候唔知會唔會撈埋一齊，答左第二科既野！不過，到而家為止，讀既科目都幾有趣既～～～希望一直落去都會咁覺得啦～～
＊＊＊
星期四，同一個Mainland exchange出去食飯。佢係我喺library訓覺既時候識架~~~而且，佢都算係我第一個見過一面就主動揾佢出嚟既人。主要因為我覺得佢把聲好溫柔，同笑容可掬既感覺令我覺得好舒服～～～覺得會相處得嚟～～～
都真係幾難得我會咁做，因為我普通話唔好嘛，我怕佢會聽唔明我講野，不過，佢話我只係自信不足啫，仲話我講得都唔差，無論佢係咪安慰我都好，都多謝佢咁講呢～～～
＊＊＊
今日成日都冇做過正經野～～～
聽日要早ｄ起身，補返數~~~~
開學第三個星期~~~感覺~~~好眼訓~~
雖然比起以前，其實係遲左少少起身～但係，一星期返四日9:00，要7:30左右起身，加上搭車來來往往，而且，一星期要補幾日習，又訓得唔係咁好，真係，攰到唔想起身！！
不過，冇辦法啦～～～
仲有好多野未睇呀～～～
不過呢～～～
上星期我都係忍唔住～～～走左去租漫畫～～～睇左４本咁多啦～～～
死神都幾好睇～～～所以今日我走左去漫ｓｏ入會，咁就唔駛比＄借啦～～～
不過，都係時候要自制一下，唔係既話～～～睇怕我會全職睇漫畫～～唔駛讀書啦～～～
上星期四同fds打羽毛球，但係，因為上完一堂有時間～～走左去library訓覺～～（原本我係諗住去library溫書架～不過，唔知點解訓覺既時間仲多過溫書～～！！哈哈～～）
然後訓到呆呆地，夠鐘就去打波啦～～～跟住，一開始，根本唔清醒到打唔到不特止，發球都發唔出......
然後......仲跌左落地，成個人仆低，pat pat落地先，真係跌到內臟都移位既感覺！！！之後～～仲痛左幾日～～～所以真係跌得好應～～～！！
中秋返左鄉下陪婆婆～～～
如果佢肯出嚟住就好啦～～～
＊＊＊
今日好掛住魚尾～～
冇佢喺度既嶺南，真係有ｄ不足既感覺～～～好掛住佢呢～
開左學一個星期~~~好似好多野等住我做咁~~~~真係.......
TIMETABLE都OK啦~~~~
加油呀～～～～
＊＊＊
約左一咁耐都未gathering到，都唔知會約到幾時～～～
＊＊＊
今日發左個夢，夢入面既我，覺得好傷心，好無奈，好失望。
重覆一次又一次既對話，我問佢，你究竟有冇聽我講野？一次又一次，然後，我放棄再要求佢理解我，最後，我喊住咁醒，但係醒左，心情都未平伏落嚟。
有ｄ分唔清楚，究竟係發夢定係真實。
係咪我心裡面一直都係咁諗既呢？
不過，真實同夢度既我，最後既答案都係一樣。
＊＊＊
明明今日想訓到９：３０，點知，冇端端７：００就醒左，好唔抵呀～
恭喜呀~~~~萬分恭喜~~~~真替你開心呀~~~恭喜你讀到RN~~~~比心機呀~~~雖然我知唔使我講你都會好比心機~~~~
真好~~~終於比你等到~~~~我都覺得好開心~~~~~
身邊既每個人都朝住理想向前行~~~
＊＊＊
又係新既一日
＊＊＊
尋日都未訓醒，就一個電話打嚟～～～然後～～～我比人炒魷耶～～～第一次補習唔係我自己走人先～～不過，冇所謂啦～～～反正我唔鐘意補習～～～佢推我好過我推佢～～～
但係～～淨反手頭上既補習就千祈唔好推我啦～～～唔係既話～～會好慘架我～～
＊＊＊
今日同fd行街～～其實應該話係佢陪我行街～～～
終於買左電話啦～～～哈～～尋日先睇到佢既廣告，今日就走去睇下啦～～然後就決定左買佢～～
好多時都係咁～～睇中左就唔會轉～～～
＊＊＊
就快開學啦～～～真係唔想咁快要返學～～～雖然，咁長既假期都唔知做左Ｄ乜～～～
＊＊＊
加油啦大家～～～
呢排既情緒唔係好穩定，前排煩自己，而家煩屋企，越大個越覺得，要快樂，真係好難。
係咪，因為越嚟越唔知足，所以，更加難覺得開心呢？
其實，比起以前，而家既我，應該係開心好多，但係，以前既我，唔愛屋企，所以，唔會因為家人而覺得唔開心。
而家，我愛我既家人，但係，反而因為咁，會因為佢地既事，而覺得唔開心。
有時候，都係覺得，做人自私Ｄ好。
至少，開心唔開心都係因為自己。
好冇用呀，想講既野，成日都因為控制唔到自己，而講唔出口，好想可以冷靜咁同佢地傾，同佢地講，但係，講講下，就忍唔住。唔想比佢地見到咁既樣。所以寧願扮冇事。
而家既我，好似人前一個樣，人後一個樣。
因為知佢地煩惱緊，所以，唔想令佢地更煩，可以既話，我只想令佢地可以開心。
但係，咁樣好攰。
根本冇辦法去令兩邊都覺得高興。
依家既我，乜都做唔到。
所以，盡量令佢地唔需要擔心我。呢個好似係我唯一可以做既野。
點解，人總係咁樣？
可唔可以自私得嚟，同時唔會傷害到身邊既人？
關係係相向架，單方面既努力，有用嗎？
咖啡豆總數: 7
