KUNG

前日約左黃姑娘同一位中學同學出去叙叙，睇到，時間既影響力真係好大。

成晚，我都冇點樣講野，一嚟，自己既私事，我唔想比另一人知，二嚟，嗰位同學太耐冇見黃姑娘，太多野想表達～～～三嚟，佢地既知識領域同我有一段距離～～～因為佢地傾既都係有關社工既野，太多專有名詞我都聽唔明，咁樣，叫做我無知？！

當一個人走左去社會大學之後，真係會思想成熟Ｄ？原以為自己經已夠成熟，但係相比之下，我就顯得太稚嫩。或者，因為佢地要煩惱既事太多，即使我有煩惱，都唔會係生計上既煩惱，好多時都係平空胡思亂想既居多。而佢地，唔單止要為自己打算，更要為家人打算，為所要面對既每一步打算，雖然，有時候，我會覺得佢地比自己既擔子太大，有時，真係要量力而為。

如果，生命真係有主宰，我都會好感謝佢比機會我存在，但係，更希望可以話比我知，我生存既意義何在？

係時候，為自己堅持一下。

發覺，好多時候，我都喺度埋怨，埋怨冇得選擇，埋怨因為要配合別人既要求而作出自己唔鍾意既選擇，埋怨，因為選擇唔適合自己而令自己失卻信心，埋怨，點解唔可以自我咁選擇自己喜歡既事，埋怨......

太多太多既埋怨，好似，我已經變成左個怨靈，淨係識喺心度抱怨，因為，可以將所有既失敗歸咎於別人，咁樣，好似令自己既失敗變得合理化，變得好應該。

一直，我應該埋怨既係自己，人生應該由自己負責，的確冇人用槍指住我個頭迫我做選擇，如果，我肯為自己而堅持一下，再一下既話。

係我，放棄左我。

我唔敢有目標，因為，怕完成唔到目標既時候，要承認自己既失敗。

我唔敢同人講，我有目標，有一直想做既野，因為，怕別人會睇到我既失敗。

嗰晚，我好佩服嗰位同學，因為，佢真係一步一步咁向住自己既目標前進。

而我，只係企左喺好遠好遠既地方，躊躇不定地，未敢舉腳向前，因為，未出發，就已經害怕結果，咁樣既自己，輸定了。

就嚟22歲，係時候要學識對自己負責任，或者，今年既願望係，可以自己為自己負責。